Hofer Mundart - Zedtwitz

Der Endnmoler vo Zedtwitz

Do wenns’d vo Hof driem nauchsmachs’d vum Schdudendnberch, do gedds dann af Zedtwitz. Und derd, middn in der Ordschafd kummd dann linkerhänd a klaaner Daich. Des wor scho immer a scheens Daichla, midd aweng aner Insel, do wor a helzerns Haisla draaf fier die Veechala. Und wall eem des Haisla scho ausgewidderd wor, hodd a Moler von heechsder Schdell na Aufdrooch grichd, des Vochelhaisla widder zer schdraingn. An an schenn Sommerdooch, do isser dann ogedreedn, der Moler mit saina Farbkiebala. Zererschd hodder amoll gschaud, dann hodder so langsam saina Farbn zamgeriehrd, dasser den richdinga Farbdon a derwischd. Der schnellsda worer nedd, mied isser worn. Und walls ja a scho Middoch wor, hodder sich noch sainer Brodzaid aweng in die Wiesn am Ufer geleecht... und do moocher dann aigschloofn saa...

Die Endn und Gens, a Schwoon wor glaabich aa derbei, hadddn den aifrichn Moler scho lang beobachd, woss der denn do so drabbd. Und waller ja am Ufer gschloofn hodd, senn die Veechel niebergemachd af die Insel, do worn die ganzn Farbdebfla nuch offngschandn. Nei senn sa mid iehra Schnäbel, -brrr-, -brrr- - hamm sa sich gschiddld und gschnadderd und dobei die ganza Farb schee verdaald.

Wie der Moler nach seim ausgiebichn Middoochsschloof widder zu sich kumma is, wor nadierlich die Farb olla, die Veechala haddn ordnlich rumsaulierd und vor ollem sich selber ogschdrichn. Said dera Zaid gedd sa um, die Gschichd vum Endnmoler vo Zedtwitz.

pehe

Öffnungszeiten des Hofer Einzelhandels